Weelcome to Website Sekong Province Public Health Department

ພິທີປາຖະກາຖາວັນສ້າງຕັ້ງກໍາມະບານລາວ ຄົບຮອບ 65 ປີ

ພະແນກສາທາລະນະສຸກແຂວງເຊກອງ ໄດ້ຈັດພິທີປາຖະກາຖາ ວັນສ້າງຕັ້ງກໍາມະບານລາວ ຄົບຮອບ 65 ປີ (ວັນທີ 01 ກຸມພາ 1956 – 01 ກຸມພາ 2021), ໃນວັນທີ 22 ມັງກອນ 2021 ທີ່ຫ້ອງປະຊຸມພະແນກສາທາລະນະສຸກແຂວງ.

 

ໃນພິທີດັ່ງກ່າວໄດ້ຮັບກຽດເປັນປະທານໂດຍທ່ານ ດຣ. ຄໍາໄຫຼ ສັນຕິພູມ ເລຂາພັກຮາກຖານ, ຫົວໜ້າພະແນກສາທາລະນະສຸກແຂວງ, ພ້ອມດ້ວຍຄະນະພັກ-ຄະນະພະແນກສາທາລະນະສຸກແຂວງ ທ່ານ ດຣ. ພູຂັນ ຈັນທະວົງ, ທ່ານ ດຣ. ນ ລໍາພັນ ໄຊຄໍາມີ ແລະ ທ່ານ ດຣ. ບົວໄລ ເກດຈັນ, ມີສາມາຊິກກໍາມະບານຮາກຖານພະແນກສາທາລະນະສຸກແຂວງເຂົ້າຮ່ວມທັງໝົດ 103 ຄົນ, ຍິງ 64 ຄົນ.

- ທ່ານ ດຣ. ຄໍາໄຫຼ ສັນຕິພູມ ໄດ້ຜ່ານເອກະສານ ວັນສ້າງຕັ້ງກໍາມະບານລາວ ຄົບຮອບ 65 ປີ (ວັນທີ 01 ກຸມພາ 1956 – 01 ກຸມພາ 2021) ໂດຍທ່ານໄດ້ເນັ້ນໜັກຕື່ມ ໃຫ້ສາມາຊິກກໍາມະບານເອົາໃຈໃສ່ມູນເຊື້ອຂອງກໍາມະບານລາວ ທີ່ມີມາແຕ່ລຸ້ນກ່ອນ.

- ທ່ານ ໝອກແກ້ວ ໝື່ນວິເສດ ຄະນະພັກຮາກຖານ ພະແນກສາທາລະນະສຸກແຂວງ ໄດ້ຜ່ານມະຕິກອງປະຊຸມໃຫ່ຍຜູ້ແທນສະຫະພັນກໍາມະບານແຂວງເຊກອງ ຄັ້ງວັນທີ VI

- ທ່ານ ນ. ຈັນສີ ວົງຄໍາສາ ປະທານສະຫະພັນກໍາມະບານ ພະແນກສາທາລະນະສຸກແຂວງ ໄດ້ຜ່ານກົດລະບຽບກອງທຶນ ກຊກ ສະບັບປັບປຸງໃນສະໄໝກອງປະຊຸມໃຫ່ຍ ຄັ້ງທີ VIຂອງສະຫະພັນກໍາມະບານແຂວງເຊກອງ

- ທ່ານ ດຣ. ພູຂັນ ຈັນທະວົງ ຄະນະພັກຮາກຖານ ພະແນກສາທາລະນະສຸກແຂວງ ໄດ້ຜ່ານວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ (20 ມັງກອນ 1949 – 20 ມັງກອນ 2021)

- ທ່ານ ດຣ. ບົວໄລ ເກດຈັນ ຄະນະພັກຮາກຖານ ພະແນກສາທາລະນະສຸກແຂວງ ໄດ້ຜ່ານ ວັນຊາດ ສາທາລະນະລັດ ກຸຍບາ ຄົບຮອບ 62 ປີ (01 ມັງກອນ 1959 – 01 ມັງກອນ 2021)

ໃນຕອນທ້າຍຂອງພິທີດັ່ງກ່າວ ທ່ານ ດຣ. ຄໍາໄຫຼ ສັນຕິພູມ ຍັງໄດ້ໃຫ້ຄໍາໂອວາດ, ຄະຕິຕັກເຕືອນຕໍ່ສາມາຊິກກໍາມະບານ ພະແນກສາທາລະນະສຸກແຂວງ ໃນການຮັກສາມູນເຊື້ອວັນສໍາຄັນດັ່ງກ່າວ, ເອົາໃຈໃສ່ປະຕິບັດລະບຽບວິໃນ, ມີຄວາມສາມັກຄີເປັນພື້ນຖານ ພ້ອມກັນຈັບມືຈູງແຂນຜ່ານຜ່າບັນຫາ, ອຸປະສັກຕ່າງໆ, ປະຕິບັດວຽກງານຕ່າງໆໃຫ້ມີຜົນສໍາເລັດເປັນຢ່າງດີ.

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates