Weelcome to Website Sekong Province Public Health Department

ແຂວງເຊກອງໄດ້ຈັດກອງປະຊຸມສະຫຼຸບວຽກງານກັນ ແລະຄວບຄຸມການລະບາດຂອງພະຍາດໄຂ້ຍຸງລາຍ, ພະຍາດໂຄວິດ-19 ປະຈໍາປີ 2020

ທ່ານຮອງເຈົ້າແຂວງໆ ເຊກອງກ່າວແນະນໍາໃຫ້ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ເມືອງ, ຂະແໜງການກ່ຽວຂ້ອງຕະຫຼອດຮອດປະຊາ ຊົນບັນດາເຜົ່າພ້ອມກັນປະຕິບັດມາດຕະການຜ່ອນຜັນຈາກຄໍາສັ່ງ 06/ນຍ ແລະບາງວຽກສໍາຄັນ ເພື່ອແນໃສ່ປ້ອງກັນການລະບາດຂອງພະຍາດໂຄວິດ-19.

 

ວັນທີ 22 ທັນວາ 2020 ນີ້ ແຂວງເຊກອງໄດ້ຈັດກອງປະຊຸມສະຫຼຸບລາຍງານການເຄື່ອນໄຫວວຽກງານກັນ ແລະຄວບຄຸມການລະບາດຂອງພະຍາດໄຂ້ຍຸງລາຍ, ພະຍາດໂຄວິດ-19 ປະຈໍາປີ 2020 ແລະວາງແຜນການປີ 2021 ຂຶ້ນ ໂດຍມີທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ປະທານຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ພຣະເຖຣະນຸເຖຣະ ແລະຂະແໜງການກ່ຽວຂ້ອງອ້ອມຂ້າງແຂວງ-ເມືອງເຂົ້າຮ່ວມ.

ໃນກອງປະຊຸມທ່ານຮອງເຈົ້າແຂວງມີຄໍາເຫັນໂດຍເນັ້ນໜັກໃຫ້ຄະນະສະເພາະຂັ້ນແຂວງ, ເມືອງ, ຂະແໜງການ ແລະປະຊາຊົນບັນດາເຜົ່າພ້ອມກັນປະຕິບັດມາດຕະການຜ່ອນຜັນຈາກຄໍາສັ່ງ 06/ນຍ ແລະບາງວຽກທີ່ສໍາຄັນຄື: ໜຶ່ງສືບຕໍ່ເອົາໃຈໃສ່ກວດກາເອກະສານຢັ້ງຢືນຄວາມຈໍາເປັນການເຂົ້າແຂວງເຊກອງຂອງຄົນຕ່າງປະເທດ; ສອງກໍານົດຈຸດຈໍາກັດບໍລິເວນຂອງບັນດາເມືອງໃຫ້ລະອຽດ, ປະກອບວັດຖຸອຸປະກອນຮັບໃຊ້ຕ່າງໆໃຫ້ມີໄວ້ຄົບຊຸດ; ສາມເພີ່ມທະວີຄວາມຮັບຜິດຊອບຕໍ່ບຸກຄົນທີ່ຖືກກັກບໍລິເວນ, ປຸກລະດົມໃຫ້ມີຫຼາຍພາກສ່ວນຮັບຜິດຊອບຊ່ວຍກັນ (ຄ່າໃຊ້ຈ່າຍຕ່າງໆ); ສີ່ ເພີ່ມທະວີການຄຸ້ມຄອງພາຫະນະ-ສິນຄ້ານໍາເຂົ້າຈາກປະເທດທີ່ມີຄວາມສ່ຽງ, ໃຫ້ມີການກວດກາລະອຽດ; ຫ້າ ມອບໃຫ້ຄະນະສະເພາະກິດຂຶ້ນແຜນງົບປະມານການເຄື່ອນໄຫວວຽກງານສະເໜີຫາການນໍາຂອງແຂວງ; ຫົກ ມອບໃຫ້ຂະແໜງການກ່ຽວຂ້ອງ ໂດຍສະເພາະສອງກໍາລັງປະກອບອາວຸດປະຕິບັດມາດຕະການ (ດໍາເນີນຄະດີ) ຕໍ່ບຸກຄົນລະເມີດເຂົ້າເມືອງຜິດລະບຽບກົດໝາຍ, ສ່ວນບຸກຄົນທີ່ມີເອກະສານຖືກຕ້ອງແຕ່ບໍກັກບໍລິເວນຕົນເອງກໍຕ້ອງປັບໃໝຕາມລະບຽບການ; ເຈັດ ຄະນະສະເພາະຂັ້ນແຂວງຕ້ອງເປັນເຈົ້າການນໍາພາ-ຊີ້ນໍາ, ຂັ້ນເມືອງກໍຕ້ອງເປັນເຈົ້າການນໍາພາ-ຊີ້ນໍາຂັ້ນບ້ານ ແລະບ້ານກໍຕ້ອງນໍາພາ-ຊີ້ນໍາປະຊາຊົນປະຕິບັດມາດຕະການຕ່າງໆທີ່ຂັ້ນເທິງວາງອອກ; ແປດ ປະສານສົມທົບສ່ອງແສງລາຍງານຂໍ້ມູນຄວາມຖືກຕ້ອງຕ່າງໆໃຫ້ຂະແໜງການສາຍຕັ້ງ ເພື່ອພ້ອມກັນແກ້ໄຂບັນຫາຕ່າງໆໃຫ້ທັນຕາມກໍານົດເວລາ ແລະວຽກສຸດທ້າຍແມ່ນມອບໃຫ້ພະແນກສາທາລະນະສຸກປະສານສົມທົບກັບຂະແໜງການກ່ຽວຂ້ອງປັບປຸງຂໍ້ຕົກລົງແຕ່ງຕັ້ງຄະນະສະເພາະກິດຂັ້ນແຂວງ ທັງນີ້ ກໍເພື່ອແນໃສ່ເຮັດໃຫ້ການເຄື່ອນໄຫວວຽກງານຂອງຄະນະສະເພາະມີຄວາມສະດວກ ແລະທັນກັບສະພາບຄວາມເປັນຈິງ.

ດ້ານທ່ານ ຄໍາພູຊາ ທໍາມະວົງສາ ຮອງຫົວໜ້າຂະແໜງຄວບຄຸມພະຍາດຕິດຕໍ່ແຂວງເຊກອງລາຍງານວ່າ: ພະ ຍາດໂຄວິດ-19 ຍັງເປັນໄພຄຸກຄາມບັນດາປະເທດໃນທົ່ວໂລກ, ມາຮອດວັນທີ 20 ທັນວາ 2020 ມີຕົວເລກຄົນຕິດເຊື້ອພະຍາດດັ່ງກ່າວຈາກ 220 ປະເທດທົ່ວໂລກທັງໝົດ 76.707.526 ຄົນ, ປິ່ນປົວດີ 53.828.557 ຄົນ ແລະເສຍຊີວິດ 1.693.676 ຄົນ, ສ່ວນປະເທດອາຊຽນມີການຢັ້ງຢືນຜູ້ຕິດເຊື້ອ 1.387.059 ຄົນ, ປິ່ນປົວດີ 1.184.881 ຄົນ ແລະເສຍຊີວິດ 31.516 ຄົນ ແລະ ສປປ ລາວເລີ່ມແຕ່ເດືອນມັງກອນ 2020 ມາເຖິງປະຈຸບັນ ກວດພົບຜູ້ຕິດເຊື້ອ COVID-19 ຈໍານວນ 41 ຄົນ, ປິນປົວດີ 36 ຄົນ ແລະຍັງສືບຕໍ່ປິ່ນປົວ 15 ຄົນ.

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates