Weelcome to Website Sekong Province Public Health Department

ແຂວງເຊກອງ ໄດ້ເປີດຂະບວນການສັກວັກຊິນ ປ້ອງກັນພະຍາດ ໂຄວິດ-19 ຮອບທີ 01

ໃນຕອນເຊົ້າຂອງວັນທີ 11 ມີນາ 2021, ແຂວງເຊກອງໄດ້ເປີດຂະບວນການສັກວັກຊິນ ປ້ອງກັນພະຍາດ ໂຄວິດ-19 ແກ່ກຸ່ມເປົ້າຫມາຍ ທີ່ມີຄວາມສ່ຽງສູງໃນ ຮອບທີ 01 ຂື້ນ ທີ່ໂຮງໝໍແຂວງເຊກອງ,

ໂດຍໃຫ້ກຽດເຂົ້າຮ່ວມຂອງທ່ານ ດຣ. ຄໍາໄຫຼ ສັນຕິພູມ ເລຂາຄະນະພັກຮາກຖານ ຫົວໜ້າພະແນກສາທາແຂວງ, ທ່ານ ດຣ. ເພັດສະໃໝ ເທບວົງສາ ຫົວໜ້າຄະນະອໍານວຍການໂຮງໝໍແຂວງ ພ້ອມດ້ວຍພະນັກງານແພດໝໍເຂົ້າຮ່ວມ.

ໃນພິທີດັ່ງກ່າວ ທ່ານ ດຣ. ຄໍາໄຫຼ ສັນຕິພູມ ເລຂາຄະນະພັກຮາກຖານ ຫົວໜ້າພະແນກສາທາລະນະສຸກແຂວງ ໄດ້ຊີ້ແຈງການໃຫ້ວັກຊິນ ປ້ອງກັນພະຍາດໂຄວິດ-19 ໃນຄັ້ງນີ້ວ່າ: ອີງໃສ່ການແຜ່ລະບາດຂອງເຊື້ອພະຍາດໂຄວິດ-19 ໃນບັນດາປະເທດຕ່າງໆ ໃນທົ່ວໂລກ ແລະ ແຂວງເຊກອງ ກໍ່ແມ່ນແຂວງໜຶ່ງທີ່ມີຄວາມສ່ຽງ ທີ່ຈະເກີດມີຜູ້ຕິດເຊື້ອພະຍາດດັ່ງກ່າວ ຍ້ອນວ່າແຂວງເຮົາມີຊາຍແດນຕິດຈອດກັບປະເທດທີ່ມີການລະບາດ, ສະນັ້ນເພື່ອເປັນການຕັດວົງຈອນ ການແຜ່ລະບາດຂອງເຊື້ອ ພະຍາດ ໂຄວິດ-19 ແລະ ເພື່ອເປັນການສ້າງພູມຄຸ້ມກັນໃຫ້ແກ່ຮ່າງກາຍ ໃນການປ້ອງກັນພະຍາດໂຄວິດ-19, ດັ່ງນັ້ນ ພັກ-ລັດຖະບານ ຈຶ່ງໄດ້ນໍາເຂົ້າ ແລະຈັດແບ່ງ ວັກຊິນ ປ້ອງກັນ ໂຄວິດ -19 ເພື່ອສັກໃຫ້ແກ່ກຸ່ມເປົ້າໝາຍທີ່ມີ ຄວາມສ່ຽງສູງ ຢູ່ພາຍໃນແຕ່ລະແຂວງເຊັ່ນ: ຄະນະນໍາຂັ້ນແຂວງ-ເມືອງ, ພະນັກງານແພດ-ໝໍ ພະນັກງານປະຈໍາດ່ານ, ເຈົ້າໜ້າທີ່ ປກສ, ປກຊ ທີ່ເຮັດໜ້າທີ່ ທີ່ມີຄວາມສ່ຽງ. 

 

ສໍາລັບແຂວງເຊກອງ ແມ່ນໄດ້ວັກຊິນ ໃນຮອບທໍາອິດຈໍານວນ 4,000 ໂດສ໌, ໃນກຸ່ມເປົ້າໝາຍທີ່ມີຄວາມສ່ຽງສູງ ແມ່ນມີ ສອງພັນກວ່າຄົນ, ຜູ້ໜຶ່ງຈະໄດ້ຮັບ 02 ເຂັມ, ຫ່າງກັນຈາກເຂັມ1 ຫາ ເຂັມ2, 28 ວັນ, ໃຫ້ສຳເລັດກ່ອນປີໃໝ່ລາວ, ເຊີ່ງ ວັກຊິນດັ່ງກ່າວ ແມ່ນໄດ້ຮັບຮອງຈາກອົງການອະນາໄມໂລກ ເຊິ່ງເປັນວັກຊິນທີ່ມີຄວາມປອດໄພ ແລະ ມີປະສິດທິພາບສູງ. ສະນັ້ນຈຶ່ງຂໍຮຽກຮ້ອງມາຍັງ ຜູ້ທີ່ນອນຢູ່ໃນເປົ້າໝາຍການຮັບວັກຊິນໂຄວິດ-19ໃນຮອບທີ 01 ນີ້ຂໍໃຫ້ເຂົ້າມາຮັບວັກຊິນ ຕາມວັນເວລາທີ່ ທາງພະແນກສາທາລະນະສຸກແຂວງ ໄດ້ແຈ້ງການ ສໍາລັບພາຍໃນແຂວງ ແມ່ນເລີ່ມແຕ່ວັນທີ 11-15 ມີນາ 2021 ສະຖານທີ່ໂຮງໝໍແຂວງ.

ໃນຕອນທ້າຍຂອງພິທີ ທ່ານ ດຣ. ຄໍາໄຫຼ ສັນຕິພູມ ເລຂາຄະນະພັກຮາກຖານ ຫົວໜ້າພະແນກສາທາລະນະສຸກແຂວງ ໄດ້ນໍາພາພະນັກງານພະແນກສາທາລະນະສຸກແຂວງ, ແພດໝໍພາຍໃນໂຮງໝໍ ພ້ອມດ້ວຍພະນັກງານສາທາລະນະສຸກແຂວງ ເຂົ້າຮັບບໍລິການວັກຊິນເປັນມື້ທໍາອິດ ເພື່ອສ້າງຄວາມໝັ້ນໃຈ ໃຫ້ແກ່ ກຸ່ມເປົ້າຫມາຍໃນການຮັບວັກຊິນໃນຄັ້ງນີ້.

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates