Weelcome to Website Sekong Province Public Health Department

ໃນວັນທີ 10 ກຸມພາ 2020ຫ້ອງການສາທາລະນະສຸກເມືອງກະລຶມສໍາເລັດການເຜີຍແຜ່ຜົນ ກອງປະຊຸມໄຂ້ຍູງລາຍ ທົ່ວປະເທດ ປະຈໍາປີ 2019

  ກອງປະຊຸມເຜີຍແຜ່ຜົນສໍາເລັດຂອງກອງປະຊຸມໄຂ້ຍູງລາຍທົ່ວປະເທດ, ໄດ້ຈັດຂຶ້ນໃນວັນທີ 10 ກຸມພາ 2020 ນີ້ຢູ່ທີ່ຫ້ອງປະຊຸມ ຫ້ອງການສາທາລະນະສຸກ ເມືອງກະລຶມ,ແຂວງເຊກອງ

ໂດຍມີ ທ່ານ ບົວເງິນ ພຽນດາວັນ ຮອງເຈົ້າເມືອງໆກະລຶມ, ທ່ານ ດຣ ນາງ ລຳພັນ ໄຊຄຳມີ ຮອງຫົວໜ້າພະແນກສາທາລະນະສຸກ ແຂວງ, ມີບັນດາຫ້ອງການທີ່ກ່ຽວຂ້ອງ, ຄະນະກຳມະການຄວບຄຸມພະຍາດຕິດຕໍ່ຂັ້ນແຂວງ-ເມືອງ, ອົງການປົກຄອງ 5 ບ້ານ ເທດສະບານເຂົ້າຮ່ວມ.

 ໃນກອງປະຊຸມ ທ່ານ ຄຳພູຊາ ທຳມະວົງ ຮອງຫົວຫນ້າຂະແໜງຄວບຄຸມພະຍາດຕິດຕໍ່ ໄດ້ລາຍງານກ່ຽວກັບຜົນສໍາເລັດຂອງກອງ ປະຊຸມໄຂ້ຍູງລາຍທົ່ວປະເທດ ໃນປີ 2019 ແລະ ແຜນປີ 2020 ກ່ຽວກັບການຈັດຕັ້ງປະຕິບັດການຄວບຄຸມພະບາດໄຂ້ຍູງລາຍ ໂດຍບັນຫາສໍາຄັນ ແມ່ນວຽກງານເຝົ້າລະວັງ ເຊິ່ງທຸກໂຮງໝໍສູນກາງ, ແຂວງ, ເມືອງ ໄດ້ມີການເຝົ້າລະວັງ ແລະຄວບຄຸມຢ່າງຈິງຈັງ ດ້ວຍການຍົກສູງຄຸນນະພາບການປິ່ນປົວ, ການຄຸ້ມຄອງກໍລະນີພະຍາດໄຂ້ຍູງລາຍ ເພື່ອຫຼີກເວັ້ນການເສຍຊີວິດ; ພ້ອມນີ້ ກໍໄດ້ມີການໂຄສະນາວິທີປ້ອງກັນ, ວິທີທໍາລາຍແຫຼ່ງເພາະພັນຍູງລາຍ ແລະມີການປຸກລະດົມໃຫ້ທົ່ວສັງຄົມມີສ່ວນຮ່ວມ ໂດຍໃນປີ 2019 ຜູ້ມີຕິດເຊື້ອໄຂ້ຍູງລາຍທົ່ວປະເທດ ສູງເຖິງ 39.091 ຄົນ; ໃນນັ້ນ, ເສຍຊີວິດ 76 ຄົນ, ຂະນະທີ່ປີ 2018 ມີຜູ້ຕິດເຊື້ອໄຂ້ຍູງລາຍທົ່ວປະເທດ ພຽງ 6.446 ຄົນ ແລະ ເສຍຊີວິດ ພຽງ 15 ຄົນ, ສະເພາະ ຢູ່ແຂວງເຊກອງ ມີຜູ້ຕິດເຊື້ອໄຂ້ຍູງລາຍ ໃນປີ 2019 ຈໍານວນ 758 ຄົນ ແຕ່ບໍ່ມີກໍລະນີເສຍຊີວິດ ແລະ ໃນປີ 2018 ກໍມີຜູ້ຕິດເຊື້ອໄຂ້ຍູງ ຈໍານວນ 829 ຄົນ. ນອກນີ້ ທ່ານ ຍັງໄດ້ເຜີຍແຜ່ຂໍມູນຂ່າວສານສະພາບການລະບາດຂອງພະຍາດອັກເສບປອດສາຍພັນໃໝ່ ແລະ ແຜນການຕອບໂຕ້ພະຍາດດັ່ງກ່າວ.

 ທ່ານ ດຣ ນາງ ວັນຊະນະ ຫານສັກດາ ຫົວໜ້າໜ່ວຍງານວິຊາການປິ່ນປົວໂຮງໝໍແຂວງ, ຜູ້ຮັບຜິດຊອບຄວບຄຸມພະຍາດລະບາດ ຍັງໃຫ້ຮູ້ຕື່ມກ່ຽວກັບວິທີ່ການປ້ອງກັນພະຍາດອັກເສບປອດສາຍພັນໃໝ່ ຫຼື ໄວຣັດສ໌ໂຄໂຣນາ ສາຍພັນໃໝ່ ທີ່ກຳລັງລະບາດຢູ່ໃນ ຂະນະນີ້ ແລະ ຫວັງວ່າທຸກໆຄົນຈະມີຄວາມຮູ້ ແລະ ຄວາມເຂົ້າໃຈ ຕໍ່ເຊື້ອພະຍາດ ໂຄໂຣນາ ໄວຣັດສ໌ ສາຍພັນໃໝ່ນີ້ຢ່າງຖືກຕ້ອງ ແລະ ບໍ່ຕ້ອງຕື່ນຕົກໃຈ ແລະ ຢ້ານກົວຈົນເກີນໄປ, ພ້ອມດຽວກັນນີ້ ກໍຢ່າເຜີຍແຜ່ຂໍ້ມູນທີ່ບໍ່ເປັນຄວາມຈິງອອກໄປ.


 ໂອກາດດຽວກັນນີ້ ທ່ານ ດຣ ນາງ ລຳພັນ ໄຊຄຳມີ ຮອງຫົວໜ້າພະແນກສາທາລະນະສຸກ ກໍໄດ້ໂອ້ລົມ ໂດຍກ່ອນອື່ນໝົດໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການຈັດຕັ້ງປະຕິບັດວຽກງານໃນໄລຍະທີ່ຜ່ານມາພ້ອມນີ້ກໍໄດ້ໃຫ້ທິດຊີ້ນຳວຽກງານຫຼາຍໆ ດ້ານໃຫ້ແກ່ທີມງານແພດໝໍ ເພື່ອເຮັດໃຫ້ການຈັດຕັ້ງປະຕິບັດຂອງວຽກງານສາທາລະນະສຸກພາຍໃນເມືອງກະລຶມໃຫ້ດີຂຶ້ນກວ່າເກົ່າ.

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates