Weelcome to Website Sekong Province Public Health Department

ພິທີມອບ-ຮັບ ລະບົບນໍ້າປະປາຊຸມຊົນ ຢູ່ບ້ານຕອກອົງແກ້ວ ເມືອງລະມາມ ແຂວງເຊກອງ

ໃນວັນທີ 5 ກຸມພາ 2020 ທີ່ຫ້ອງການບ້ານ ຕອກອົງແກ້ວ ເມືອງລະມາມ ແຂວງເຊກອງ ໄດ້ຈັດພິທີມອບ-ຮັບລະບົບນໍ້າປະປາຊຸມຊົນ

ລະຫວ່າງອົງການຊ່ວຍເຫຼືອເຊີ່ງກັນແລະກັນປະຈຳແຂວງເຊກອງ ກັບຫ້ອງວ່າການເມືອງລະມາມ, ໃຫ້ກຽດເຂົ້າຮ່ວມພິທີໂດຍ ທ່ານ ນາງ ຄຳປຸຍ ພົມມະຈັນ ຄະນະຫ້ອງວ່າການເມືອງລະມາມ, ທ່ານ ນາງ ເກດ ຕາງໜ້າໃຫ້ອົງການຊ່ວຍເຫຼືອເຊີ່ງກັນແລະກັນ ປະຈຳແຂວງເຊກອງ ( ໃນນາມຜູ້ໃຫ້ທຶນ ), ທ່ານ ໝອກແກ້ວ ໝື່ນວິເສດ ຫົວໜ້າຫ້ອງການບໍລິຫານ ຕາງໜ້າພະແນກສາທາລະນະສຸກແຂວງ, ທ່ານ ວັນນະຄອນ ຕ່າງໜ້າໃຫ້ຫ້ອງການສາທາເມືອງລະມາມ ແລະ ອຳນາດການປົກຄອງບ້ານ ພ້ອມດ້ວຍປະຊາຊົນພາຍໃນບ້ານດັ່ງກ່າວເຂົ້າຮ່ວມເປັນສັກຂີພິຍານ..

                   

ທ່ານ ໄຊນະລົງ ສິດທິສັກ ວິຊາການລະບົບນໍ້າ ໂຄງການສ້າງຄວາມເຂັ້ມແຂງດ້ານການບໍລິການ ຮັກສາສຸຂະພາບໄລຍະ 2 ( ໃນນາມເຈົ້າຂອງໂຄງການ ) ກ່າວວ່າ: ເພື່ອເຮັດໃຫ້ປະຊາຊົນບ້ານຕອກອົງແກ້ວ ເມືອງລະມາມ ແຂວງເຊກອງ ໄດ້ມີນໍ້າໃຊ້ທີ່ສະອາດ, ພຽງພໍ, ມີສຸຂະອານາໄມທີ່ດີ ແລະເອື້ອຍອຳນວຍຄວາມສະດວກໃນການປັບປຸງຊີວິດການເປັນຢູ່ໃຫ້ແກ່ເຂົາເຈົ້າ ອົງການຊ່ວຍເຫຼືອເຊີ່ງກັນແລະກັນປະຈຳແຂວງ ໄດ້ສະໜັບສະໜູນທຶນຊ່ວຍເຫຼືອຈຳນວນໜື່ງ ເພື່ອຈັດຊື້ອຸປະກອນກໍ່ສ້າງ ແລະອຳນວຍຄວາມສະດວກໃຫ້ແກ່ວິຊາການນຳພາການກໍ່ສ້າງ ໂດຍການມີສ່ວນຮ່ວມຂອງປະຊາຊົນ, ເຊີ່ງໂຄງການລະບົບນໍ້າປະປາຊຸມຊົນ ບ້ານຕອກອົງແກ້ວ ໄດ້ລົງມືຈັດຕັ້ງປະຕິບັດການກໍ່ສ້າງ ມາແຕ່ວັນທີ 27 ຕຸລາ 2019 ແລະສຳເລັດ ໃນວັນທີ 8 ມັງກອນ 2020, ມີມູນຄ່າການກໍ່ສ້າງທັງໝົດ ຈຳນວນ 95 ລ້ານ 7 ແສນກວ່າກີບ, ໃນນີ້ມີທຶນທີ່ໄດ້ຮັບການຊ່ວຍເຫຼືອຈາກອົງການຊ່ວຍເຫຼືອເຊີ່ງກັນແລະກັນ ຈຳນວນ 79 ລ້ານ 2 ແສນກວ່າກີບ ແລະທຶນສົມທົບຈາກປະຊາຊົນພາຍໃນບ້ານ ຈຳນວນ 16 ລ້ານ 5 ແສນກວ່າກີບ; ໃນຄະນະດຽວກັນນີ້ ອົງການຊ່ວຍເຫຼືອເຊີ່ງກັນແລະກັນປະຈຳແຂວງເຊກອງ ຍັງໄດ້ໃຫ້ທຶນຊ່ວຍເຫຼືອບ້ານດັ່ງກ່າວໃນການກໍ່ສ້າງວິດຖ່າຍ ຈຳນວນ 23 ຫຼັງຄາເຮືອນ ມູນຄ່າ 16 ລ້ານກວ່າກີບ, ລວມທັງໝົດໃນການກໍ່ສ້າງລະບົບນໍ້າປະປາຊຸມຊົນ ແລະການກໍ່ສ້າງວິດຖ່າຍ ມູນຄ່າຈຳນວນ 111 ລ້ານ 8 ແສນກວ່າກີບ, ໃຫ້ກຽດມອບໂຄງການລະບົບນໍ້າປະປາຊຸມຊົນໃນຄັ້ງນີ້ ໂດຍທ່ານ ນາງ ເກດ ຕາງໜ້າໃຫ້ແກ່ອົງການຊ່ວຍເຫຼືອເຊີ່ງກັນແລະກັນ ແລະ ທ່ານ ນາງ ຄຳປຸຍ ພົມມະຈັນ ຄະນະຫ້ອງວ່າການເມືອງລະມາມ ເປັນຜູ້ກ່າວຮັບ.

 

ໃນໂອກາດນີ້ ທ່ານ ນາງເກດ ຍັງໄດ້ມີຄວາມເຫັນວ່າ: ລະບົບນໍ້າປະປາຊຸມຊົນ ແມ່ນມີຄວາມສຳຄັນຫຼາຍ ໃນການນຳໃຊ້ເຂົ້າໃນການປັບປຸງຊີວິດການເປັນຢູ່ຂອງປະຊາຊົນ ສະນັ້ນເພື່ອເປັນການປົກປັກຮັກສາ ແລະນຳໃຊ້ໃຫ້ຍືນຍົງ ຈິ່ງຮຽກຮ້ອງມາຍັງພາກສ່ວນທີ່ກ່ຽວຂ້ອງຂັ້ນແຂວງ-ເມືອງ ເອົາໃຈໃສ່ຊີ້ນຳ-ນຳພາ ແລະຈັດຕັ້ງຄະນະຄຸ້ມຄອງບໍລິຫານລະບົບນໍ້າ ຮວ່ມກັບອຳນາດການປົກຄອງບ້ານຢ່າງເປັນລະບົບ ໂດຍໃຫ້ປະຊາຊົນມີສ່ວນຮ່ວມແລະເປັນເຈົ້າການໃນການປົກປັກຮັກສາ ເພື່ອຮັບປະກັນໄດ້ໃນການຊົມໃຊ້ໃຫ້ເກີດປະໂຫຍດສູງສຸດ ແລະຍາວນານ

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates