Weelcome to Website Sekong Province Public Health Department

ສທຂ ເຊກອງ ຫວນຄືນມູນເຊື້ອວັນສ້າງຕັ້ງອົງການກໍາມະບານລາວຄົບຮອບ 64 ປີ ແລະ ປະກາດເປັນສະຫະພັນກໍາມະບານພະແນກສາທາລະນະສຸກແຂວງ

ວັນທີ 4 ກຸມພາ 2020 ສະຫະພັນກໍາມະບານພະແນກສາທາລະນະສຸກແຂວງເຊກອງ ໄດ້ຈັດຕັ້ງພິທີຫວນຄືນມວນເຊື້ອວັນສ້າງຕັ້ງອົງການກໍາມະບານລາວຄົບຮອບ 64 ປີ (1 ກຸມພາ 1965-1 ກຸມພາ 2020)

ໂດຍການໃຫ້ກຽດເຂົ້າຮ່ວມຂອງທ່ານ ວົງເດືອນ ຈັນທະບຸດຊຽງ ປະທານສະຫະພັນກໍາມະບານແຂວງ, ທ່ານ ດຣ ຄໍາໄຫຼ ສັນຕິພູມ ຮອງຫົວໜ້າພະແນກສາທາລະນະສຸກແຂວງ, ທ່ານ ນາງ ຈັນສີ ວົງຄໍາສາ ປະທານສະຫະພັນກໍາມະບານພະແນກສາທາລະນະສຸກແຂວງ, ມີບັນດາຄະນະພັກຮາກຖານ, ຄະນະພະແນກ ແລະສະມາຊິກກໍາມະບານເຂົ້າຮ່ວມ.


ໃນພິທີລະນຶກມູນເຊື້ອດັ່ງກ່າວ ປະທານສະຫະພັນກໍາມະບານແຂວງໄດ້ຍົກໃຫ້ເຫັນເຖິງສະພາບແວດລ້ອມທີ່ພາໃຫ້ມີອົງການຈັດຕັ້ງກຳມະບານລາວ, ການເຕີບໃຫຍ່ຂະຫຍາຍຕົວ ແລະການຕໍ່ສູ້ທີ່ຍືດເຍື້ອຍາວນານຂອງພັກຕ້ານກັບຈັກກະພັດຜູ້ຮຸກຮານ, ຍ້ອນທົນຕໍ່ການກົດຂີ່ຂູດຮີດຂອງພວກລ່າເມືອງຂຶ້ນ ແລະພວກສັກດິນາປະຕິການບໍ່ໄດ້, ກຳ ມະກອນຊາວຜູ້ອອກແຮງງານ ແລະປະຊາຊົນລາວບັນດາເຜົ່າ ຈຶ່ງໄດ້ພ້ອມກັນລຸກຂຶ້ນຕໍ່ສູ້ຢ່າງອົງອາດກ້າຫານໃນຫຼາຍໆຄັ້ງ, ຫຼາຍເຫດການເປັນຕົ້ນ: ແມ່ນການຕໍ່ສູ້ຂອງກໍາມະກອນຢູ່ບໍ່ກົ່ວໂພນຕິ້ວ, ກຳມະກອນໄຟຟ້າວຽງຈັນ, ກຳມະກອນແລ່ນເຮືອຈັກຈຳປາສັກ, ຫຼວງພະບາງ, ກຳມະກອນສ້າງທາງເລກ9 ແລະພາກສ່ວນອື່ນໆ.

ມາໃນປີ 1956-1965 ພາຍຫຼັງທີ່ສ້າງຕັ້ງພັກປະຊາຊົນປະຕິວັດລາວຂຶ້ນເກືອບ 1 ປີ, ສູນກາງພັກກໍໄດ້ມີມະຕິຕົກລົງສ້າງຕັ້ງຫ້ອງການກຳມະບານລາວຂຶ້ນຢ່າງເປັນທາງການ ຢູ່ເຂດທີ່ໝັ້ນແຂວງຫົວພັນ ແລະໄດ້ມອບໃຫ້ສະຫາຍ ສີສົມພອນ ລໍວັນໄຊ ເປັນຜູ້ຈັດຕັ້ງນຳພາ ເພື່ອຂົນຂວາຍເຕົ້າໂຮມກຳມະກອນໃຫ້ມີຄວາມຕື່ນຕົວເຮັດການປະຕິວັດ ແລະໄດ້ນຳພາໜ່ວຍກຳມະບານແຕ່ເໜືອຮອດໃຕ້ເຄື່ອນໄຫວເຕົ້າໂຮມຄວາມສາມັກຄີໃນໝູ່ຊົນຊັ້ນກຳມະກອນ ແລະຊາວຜູ້ອອກແຮງງານລາວບັນດາເຜົ່າຕໍ່ສູ້ ເພື່ອທວງເອົາສິດຜົນປະໂຫຍດອັນຊອບທຳທາງດ້ານເສດຖະກິດ, ວັດທະນະທໍາ-ສັງ ຄົມ ແລະຂະບວນການຕໍ່ສູ້ກໍ່ເຫັນວ່າມີຖ່ວງທ່າໄດ້ຮັບໄຊຊະນະຂຶ້ນໄປເລື້ອຍໆ ສາມາດຍາດເອົາເອກະລາດແຫ່ງຊາດ ແລະອິດສາລະພາບອັນແທ້ຈິງມາສູ່ປະຊາຊົນລາວບັນດາເຜົ່າໃນປັດຈຸບັນ.

 

ໃນໂອກາດດຽວກັນ ທ່ານ ນາງ ທອງສາຍ ບຸນທະວົງສາ ຫົວໜ້າຂະແໜງຈັດຕັ້ງ, ສະຫະພັນກໍາມະບານແຂວງເຊກອງ ໄດ້ຂຶ້ນຜ່ານຂໍ້ຕົກລົງຂອງປະທານສະຫະພັນກໍາມະບານແຂວງ ວ່າດ້ວຍການສ້າງຕັ້ງກໍາມະບານຮາກຖານພະແນກສາທາລະນະສຸກແຂວງ ເປັນສະຫະພັນກໍາມະບານພະແນກສາທາລະນະສຸກແຂວງ ແລະຂໍ້ຕົກລົງວ່າດ້ວຍຮັບຮອງເອົາຄະນະບໍລິຫານງານສະຫະພັນກໍາມະບານພະແນກສາທາລະນະສຸກແຂວງ ຊຶ່ງປະກອບດ້ວຍ 7 ທ່ານ, ຍິງ 4 ທ່ານຄື: ທ່ານ ນາງ ຈັນສີ ວົງຄໍາສາ ເປັນປະທານ, ທ່ານ ສຸກກະເສີມ ສີວົງສາ ເປັນຮອງປະທານ, ທ່ານ ເພັດສະໝອນ ແພງສຸລິພັນ ເປັນຮອງປະທານ ແລະເປັນປະທານກວດກາ, ຂະນະທີ່ທ່ານ ໝອກແກ້ວ ໝື່ນວິເສດ, ທ່ານ ນາງ ພູວົງ ສິມມະວັນ, ທ່ານ ນາງ ລິນໄຊ ພະສະແຫວງ ແລະທ່ານ ນາງ ວາລິນ ເພັງພະຈັນ ເປັນຄະນະ.

ພະ​ແນກ​ສາ​ທາ​ລະ​ນະ​ສຸກ ແຂວງ​ເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38-211 819, ແຟກ:(+856)38-211 020

Powered by Joomla 1.7 Templates